जेएनपीटी बंदरात दोन नवे कंटेनर एक्स-रे स्कॅनर

 

 

जेएनपीटी । जेएनपीटी बंदरात आणखी दोन नवीन मोबाईल कंटेनर एक्स-रे स्कॅनर बसविण्यात आले आहेत. जेएनपीटीचे अध्यक्ष संजय सेठी यांच्या हस्ते या स्कॅनरचे उद्घाटन करण्यात आले. यामुळे जेएनपीटी बंदरातून येणार्‍या कंटेनरची तपासणी जलद होणार आहे. तसेच तस्करी रोखण्यासही मदत होणार आहे.

 

जेएनपीटीने एनएसआयसीटी व एपीएमटी येथे हे मोबाईल एक्स-रे स्कॅनर बसविले आहेत. या स्कॅनरच्या उद्घाटनप्रसंगी जेएनसीएचचे मुख्य सीमाशुल्क आयुक्त यु.निरंजन उपस्थित होते. जेएनपीटीने बंदरातील जेएनपीसीटी, डीपीवर्ल्ड आणि एपीएमटी या तीन टर्मिनल्ससाठी प्रत्येकी एक असे तीन मोबाईल कंटेनर स्कॅनर्स आयपीए मार्गे खरेदी करून स्थापित केले आहेत.

 

यासाठी एकूण 101 कोटी रुपये खर्च करण्यात आले आहेत. या तीन स्कॅनर पैकी एक स्कॅनर यापूर्वीच 30 मार्च रोजी कार्यान्वित झाला आहे. याव्यतिरिक्त, जेएनपीटीने बीएमसीटीपीएलसाठी एक ड्राईव्ह थ्रू कंटेनर स्कॅनर सुविधा सुरु केली आहे. ज्यासाठी एकूण 46.25 कोटी रुपये खर्च करण्यात आले आहेत. सध्या या प्रकल्पाचे 75 टक्के काम पूर्ण झाले असून ते मार्च 2022 पर्यंत कार्यान्वित होईल.

 

 

या नवीन मोबाईल कंटेनर स्कॅनरमुळे प्रतितास 20 कंटेनर स्कॅन केले जातील. पर्यायाने बंदराच्या कार्यक्षमतेमध्ये वाढ होईल. तसेच आयात-निर्यात व्यापारवर्गाच्या मालाची जलद गतीने वाहतूक होण्यास मदत होईल. या नवीन मोबाईल स्कॅनरमुळे टर्मिनल आवारात असलेल्या कंटेनरची तपासणी करण्यास मदत होईल. परिणामी, कंटेनर बंदरातून बाहेर पडण्याआधीच सुरक्षा यंत्रणांना योग्य ती कारवाई करता येईल.

 

या सुविधेमुळे व्यापारवर्गाचा फायदा होणार आहे, कारण नवीन मोबाईल स्कॅनरद्वारे तपासणी झाल्यानंतर डीपीडी कंटेनर थेट बंदरातून बाहेर जाऊ शकतात. स्कॅनिंगची प्रक्रिया वेगवान असल्याने सर्व भागधारकांची वेळ व खर्चाची बचत होणार आहे.

---------------------------------