पनवेलजवळ ब्रीझाला अपघात; 2 ठार 3 जण जखमी.

 

पनवेल । पेण येथे देवीदर्शनासाठी जात असताना एका ब्रिडा गाडीला मुंबई-गोवा महामार्गावर अपघात झाला. या अपघातात दोघांचा मृत्यू झाला असून 3 जण जखमी झाले आहेत. गाडीच्या चालकाचा गाडीवरील ताबा सुटल्याने सदर गाडी विरुद्ध दिशेला जावून खोल नाल्यात कोेसळली.

 

सानपाडा येथे राहणारे जीवन पाटील (52), रमेश पाटील (40), ज्ञानेश्वर पाटील (56), मनिष पाटील (35) व चालक विलास पाटील (43) हे सोमवारी रात्री ब्रीझा गाडी घेवून पेण येथील देवीच्या दर्शनाला जात होते.त्यांची गाडी पनवेल-गोवा महामार्गावरील पनवेल तालुक्यातील चिंचवण गावाच्या हद्दीत, साईकृपा ढाब्याजवळ आली असताना चालकाचा गाडीवरील ताबा सुटला आणि ती विरुद्ध दिशेला जावून खोल नाल्यात पडली.

 

या अपघातात जीवन पाटील व रमेश पाटील यांचा दुर्दैवी मृत्यू झाला आहे. इतर 3 जण जखमी झाले आहेत. त्यांना एम.जी.एम. कामोठे येथे उपचारार्थ दाखल करण्यात आले आहे. या अपघाताची नोंद पनवेल शहर पोलीस ठाण्यात करण्यात आली आहे.