न्यू बॉम्बे पेपर मिलमधून भंगार चोरी; लाखोंचा माल लंपास

 

खोपोली | खालापूर तालुयातील जांभिवली ग्रामपंचायतीच्या हद्दीत असलेल्या अजिवली येथील बंद पडलेल्या न्यू बॉम्बे पेपर मिल या कंपनीतूनमोठ्या प्रमाणात भंगाराची चोरी झाली आहे. स्थानिक पुढारी, पोलिसांना हाताशी धरून मोठ्या प्रमाणात भंगार चोरून नेल्यानंतर गुन्हा दाखल करण्यात आला.

 

 

धक्कादायक बाब म्हणजे लाखो रूपयांचा माल चोरून नेला असताना साठ हजार रूपयांचा माल चोरीला गेल्याची तक्रार दाखल झाल्याने आश्चर्य व्यक्त होत आहे. खालापूर तालुयातील जांभिवली ग्रामपंचायतीच्या हद्दीत असलेल्या अजिवली गावात न्यू बॉम्बे पेपर मिल ही कंपनी होती.

 

कंपनी बंद पडल्यानंतर कंपनीत असलेल्या किमती मशीन आणि अन्य साहित्यावर काही भंगार व्यवसायिकांचा डोळा होता. या भंगार व्यवसायिकांनी प्रथम स्थानिक पुढार्यांना हाताशी धरले. त्यानंतर पोलिसांना सोबत घेत रात्रीच्या अंधाराचा फायदा घेत क्रेन, गॅस कटरच्या मदतीने अनेक मशीन्सचे भंगार करून पोलीस बंदोबस्तात काही ट्रक माल लंपास केल्याची माहिती ग्रामस्थांनी दिली आहे.

 

खालापूर पोलीस ठाण्याच्या हद्दीत वावोशी पोलीस दूरक्षेत्रात न्यू बॉम्बे पेपर मिल ही कंपनी होती. या कंपनीतून भंगार चोरले जात असल्याची माहिती काही ग्रामस्थांनी पत्रकारांना दिल्यानंतर पत्रकारांनी पोलीस निरीक्षक सचिन पवार यांना कल्पना दिली होती. त्यानंतर पोलिसांनी कंपनीत धाव घेत काम बंद केले होते.

 

या प्रकरणी मोठा गुन्हा दाखल होणे गरजेचे असताना केवळ साठ हजार रूपयांचा माल चोरीला गेल्याची तक्रार दाखल झाल्याने आश्चर्य व्यक्त होत असून जांभिवली आणि अजिवली ग्रामस्थ या प्रकरणी जिल्हा पोलीस अधीक्षक सोमनाथ घार्गे यांच्याकडे तक्रार दाखल करणार असल्याचे वृत्त आहे.