गहाळ झालेले 10 लाखांचे मोबाईल केले परत , 71 मोबाईल मालकांना परत मिळाले ; खोपोली पोलिसांंची कौतुकास्पद कामगिरी

 

 

खोपोली । खोपोली शहरातून गहाळ झालेले 10 लाख 38 हजारांचे 71 मोबाईल मोबाईल मूळमालकांना परत करण्यात आले आहे. खोपोली पोलिसांच्या या कामगिरीचे विशेष पोलीस महानिरीक्षक संजय दराडे यांनी केले कौतुक केले आहे. पोलीस ठाण्यात गेल्यावर तक्रारदारांना न्याय मिळत नाही, असा गैरसमज आहे. तो दूर करण्याचा आमचा प्रयत्न असल्याचे विशेष पोलीस महानिरीक्षक दराडे यांनी सांगत पोलीस निरीक्षक शीतल राऊत यांच्या टिमचे कौतुक केले आहे.

 

खालापूर पोलीस ठाण्यात वार्षिक पोलिस तपासणीसाठी विशेष पोलीस महानिरीक्षक संजय दराडे आले होते. याप्रसंगी जिल्हा पोलीस अधिक्षक सोमनाथ घार्गे, उपविभागीय पोलीस अधिकारी विक्रम कदम, खोपोली पोलीस ठाण्याचे पोलीस निरीक्षक शीतल राऊत, खालापूर पोलीस ठाण्याचे पोलीस निरीक्षक सचिन पवार, रसायनी पोलीस ठाण्याचे पोलीस निरीक्षक संजय बांगर आदी पोलीस अधिकारी उपस्थित होते.

 

खोपोली पोलीस ठाणे हद्दीत 2024 मध्ये गहाळ झालेल्या मोबाईल फोन्सच्या दाखल झालेल्या तक्रारींचा नव्याने आढावा घेऊन त्यांचा शोध घेण्याचे आदेश पोलीस अधीक्षक सोमनाथ घार्गे, अपर पोलीस अधीक्षक अभिजीत शिवथरे यांनी दिले होते. त्यानंतर उपविभागीय पोलीस अधिकारी विक्रम कदम यांच्या सूचनांप्रमाणे खोपोली पोलीस ठाण्याचेवरिष्ठ पोलीस निरीक्षक शितल राऊत यांच्या मार्गदर्शनाखाली गुन्हे प्रगटीकरण पथकाचे उपनिरीक्षक अभिजीत व्हरांबळे, पोलीस कॉन्स्टेबल ए.एच.राठोड यांच्या पथकाने शोध सुरु केला.

 

खोपोली पोलीस ठाण्याच्या हद्दीमधील गहाळ झालेल्या 178 मोबाईल फोन्सचा सीआयइआर या मोबाईल ट्रेस अ‍ॅप्लिकेशनच्या माध्यमातून शोध असताना, गहाळ झालेले मोबाईल फोन्स पुन्हा ट्रेस करण्यात आले. पोलीस ठाण्याकडे दाखल असलेल्या तक्रारींमधील गहाळ झालेले 71 मोबाईल फोन्स हे महाराष्ट्राच्या विविध जिल्ह्यातील वेगवेगळ्या ठिकाणांहून परत मिळविण्यात खोपोली पोलिसांना यश प्राप्त आले.

 

या पुन्हा हस्तगत करण्यात आलेल्या मोबाईल फोन्सची एकूण किंमत ही 10 लाख 38 हजार 400 रुपये आहे. विशेष पोलीस महानिरीक्षक संजय दराडे यांच्या उपस्थितीत हे सापडलेले मोबाईल मूळ तक्रारदार, मोबाईल फोन मालकांना परत करण्यात आले आहेत. दरम्यान, खोपोली पोलिसांच्या विशेष कामगिरीचे कौतुक होत आहे. तर गहाळ झालेले मोबाईल परत मिळाल्याने तक्रारदारांच्या चेहर्‍यावर हसू उमटले असून, त्यांनी पोलिसांचे आभार व्यक्त केले.