गर्दीच्या वेळेत दर दहा मिनिटांनी धावणार मेट्रो , बेलापूर-पेंधर मेट्रो मार्गावर

 

नवी मुंबई | सिडकोच्या बेलापूर ते पेंधर या मेट्रो मार्ग क्र. १ वर २० जानेवारी २०२५ पासून मेट्रोच्या फेर्‍यांचे सुधारित वेळापत्रक लागू होणार असून सकाळी आणि सायंकाळी सर्वाधिक गर्दीच्या वेळी दर दहा मिनिटांनी मेट्रो धावणार आहे. मेट्रोच्या फेर्‍यांमध्ये वाढ झाल्याने गर्दीच्या वेळी प्रवास करणार्‍या प्रवाशांना याचा लाभ होणार आहे.

 

सिडकोतर्फे नवी मुंबई मेट्रो रेल्वे प्रकल्पांतर्गत मेट्रो मार्ग क्र. १ बेलापूर ते पेंधर विकसित करण्यात आला आहे. या मार्गावर १७ नोव्हेंबर २०२३ पासून मेट्रो सेवेचे परिचालन सुरू झाले असून प्रवाशांचा उत्तम प्रतिसाद लाभत आहे. सीबीडी बेलापूर परिसर, तळोजा औद्योगिक क्षेत्र आणि सिडकोच्या गृहसंकुलांना या मेट्रो मार्गाद्वारे उत्तम कनेक्टिव्हिटी लाभलीआहे.

 

सर्वाधिक गर्दीच्या वेळी प्रवास करणार्‍या प्रवाशांना वाढीव मेट्रो फेर्‍यांचा लाभ व्हावा याकरिता सदर मार्गावर २० जानेवारी २०२५ पासून मेट्रो फेर्‍यांचे सुधारित वेळापत्रक लागू करण्यात येणार आहे. त्यानुसार, बेलापूर आणि पेंधर स्थानकांतून सकाळी ६ वाजेपासून मेट्रो सेवा सुरू होणार आहे.

 

बेलापूर येथून रात्री १० वाजता व पेंधर येथून रात्री पावणेदहा वाजता मेट्रोची शेवटची फेरी धावणार आहे. सर्वाधिक गर्दीच्या वेळेत बेलापूर येथून सकाळी ७.३० ते १० आणि सायंकाळी ५.३० ते ८ तर पेंधर येथून सकाळी ७ ते ९.३० आणि सायंकाळी ५ ते ७.३० दरम्यान दर दहा मिनिटांनी मेट्रोची फेरी होणार आहे. गर्दीच्या वेळा वगळता उर्वरित वेळांमध्ये बेलापूर व पेंधर येथून दर १५ मिनिटांनी मेट्रो धावणार आहे.