कामोठे येथे भंगार गोदामाला आग

 

 

पनवेल | कामोठे वसाहतीत सेक्टर २३ येथे असलेल्या मोकळ्या भूखंडांवर मोठ्या प्रमाणात भंगाराची गोदामे थाटण्यात आली आहेत. रविवारी (२३ फेब्रुवारी) रात्री बाराच्या सुमारास अशाच एका गोदामात आग लागली. पनवेल पालिकेच्या अग्निशमन दलातील जवानांच्या अथक प्रयत्नानंतर आग विझवण्यात त्यांना यश आले.

 

कामोठे वसाहतीलगत असलेल्या जवाहर औद्योगिक वसाहती शेजारील मोकळ्या भूखंडावर भंगार व्यवसायकांनी आपले सम्राज्य निर्माण केले आहे. ज्या ठिकाणी आगीची घटना घडली, त्या ठिकाणापासून हाकेच्या अंतरावर घरगुती आणि व्यावसायिक सिलेंडरचा साठा करणारे गोदाम आहे. त्याचप्रमाणे परिसरात अनेक भंगार गोदाम तसेच, रसायनिक कारखाने आहेत.

 

मात्र, अग्निशमन दल घटनास्थळी वेळीच पोहचल्याने मोठी दुर्घटना टळली आहे. अनधिकृतपणे भंगार साठवण्याचा व्यवसाय करणार्‍या व्यावसायिकांविरोधात प्रशासनाने कठोर कारवाई करणे अपेक्षित असते. मात्र, हे होत नसल्याने भंगार व्यवसायिकांचे फावले असून, वसाहतीलगतचे मोकळे भूखंड हेरून त्या ठिकाणी गोदाम थाटण्याचा सपाटा लावला आहे.