आठ वर्षीय मुलीवर अतिप्रसंगाचा प्रयत्न , नराधम इसमाला पोलिसांच्या बेड्या

 

नवी मुंबई | नवीन मुंबईमधील तळोजा येथील एका नराधमाने ८ वर्षांच्या लहान मुलीवर अतिप्रसंग करण्याचा प्रयत्न केल्याची घटना समोर आली. तळोजा फेज-२ मधील केदार गृहसंकुलमधील हा धक्कादायक प्रकार समोर आला आहे. केदार गृहसंकुलात राहणार्‍या एका नराधम तरुणाने ८ वर्षीय चिमुकलीला गोड बोलून आपल्या रुममध्ये घेऊन गेला.

 

रुममध्ये नराधमाने तिच्यासमोर अश्लील चाळे करत तिच्यावर अतिप्रसंग करण्याचा प्रयत्न केला. हे पाहताच पीडित मुलीने लगेच आरडाओरडा करण्यास सुरुवात केली. नराधमाच्या तावडीतून तिने पळ काढला. मुलीचा आरडाओरडा ऐकून तेथील स्थानिक नागरिकांनी लगेच घटनास्थळाकडे धाव घेतली. नागरिकांच्या सतर्कतेमुळे मोठा अनर्थ टळला.

 

ही घटना उघडकीस येताच सोसायटीमधील संतप्त नागरिकांनी नराधम तरुणाला चोप देत पोलिसांना बोलावून त्याल पोलिसांच्या ताब्यात दिले आहे. या घटनेमुळे सोसायटीत काही काळ तणावाचे वातावरण निर्माण झाले होते. दरम्यान,नराधमाला पोलिसांनी ताब्यात घेतल्यानंतर त्याच्यावर तळोजा पोलीस ठाण्यात बाल लैंगिक अत्याचार प्रतिबंधक कायद्यासह विविध कलमांतर्गत गुन्हा दाखल करण्यात आला आहे. या घटनेचा अधिक तपास पोलीस करत आहेत.