पाली येथील एसटी बसस्थानक गैरसोईंचे आगार , पाच वर्षांपासून नुतनीकरणाचे रखडले काम

 

 

सुधागड-पाली | अष्टविनायक तीर्थक्षेत्र व सुधागड तालुयातील मुख्यालयाचे ठिकाण असलेल्या पालीतील बसस्थानकाच्या नूतनीकरणाचे काम मागील पाच वर्षांपासून रखडले आहे. नवीन इमारतीच्या पुनर्बांधणीस व नूतनीकरणास अजूनही सुरुवात झालेली नाही. तसेच स्थानकाला खड्डे, जुन्या तोडलेल्या इमारतीचे डेब्रिज, उघडा नाला, दुर्गंधी आदी विविध समस्यांनी वेढले आहे.परिणामी येथील प्रवाशांची प्रचंड गैरसोय होत आहे.

 

बसस्थानकाच्या दुरावस्थेकडे शासन व लोकप्रतिनिधी कोणाचेही लक्ष नाही. साधारण तीन वर्षांपूर्वी पाली बस स्थानकाची जुनी धोकादायक इमारत तोडण्यात आली आहे. त्यावेळी स्थानक आवारात तात्पुरत्या स्वरूपाची निवारा शेड व स्वच्छतागृह बांधण्यात आले. निवारा शेड छोटी असल्यामुळे प्रवाशांना बसण्यासाठी अडचण होते. मात्र त्यानंतर आजतागायत परिवहन महामंडळ अथवा कंत्राटदाराकडून तेथे कोणत्याही स्वरूपाचे काम सुरू करण्यात आलेले नाही.

 

जुन्या इमारतीचे डेब्रिज व राडारोडा स्थानकात तसाच पडला आहे. स्थानकातील नाल्याचा एका बाजूचा स्लॅब दुरुस्त करून तेथून अजूनही वाहतूक सुरु झालेली नाही. त्यामुळे बस एका बाजूनेच जातात व येतात त्यामुळे बसेसना ये-जा करण्यास अडथळा येतो. स्थानक आवारात पालीतील नाले व गटारांतील सांडपाणी येते. त्यामुळे येथे खूप दुर्गंधी पसरली आहे. स्थानकात मोठाले खड्डे पडले आहेत. प्रवाशांना पिण्यासाठी चांगले पाणी देखील नाही. अशा प्रकारे पाली बसस्थानकाची दूरवस्था झाली आहे. यामुळे स्थानिक नागरिक व प्रवाशांमध्ये प्रचंड संताप आहे.

स्थानकाला संरक्षक भिंत नाही. जुन्या इमारतीचा राडारोडा, तसेच बस स्थानकात खड्डे पडले आहेत. बस स्थानकाच्या आवारात पालीतील सांडपाणी येते व हे दूषित पाणी साचून दुर्गंधी व घाण पसरली आहे. स्थानकाच्या बाजूने प्रचंड झाडाझुडपे वाढले आहेत. तसेच पाली बस स्थानक हे खाजगी वाहनांचे पार्किंगचे ठिकाण बनले आहे. शिवाय निवारा शेड अपूर्ण पडत आहे. कर्मचार्‍यांचे विश्रांतीगृह देखील अपुरे पडते.

स्थानकाला कोणत्याही प्रकारची संरक्षक भिंत नाही त्याचबरोबर निवारा शेड देखील खुली आहे. रात्रीच्या वेळी देखील येथे कोणी नसते. त्यामुळे महिलांच्या सुरक्षेचा प्रश्न उपस्थित होतो.

नवीन बस स्थानक नूतनीकरणासाठी तब्बल २ कोटी ३६ लाखांचा निधी नोव्हेंबर- डिसेंबर २०१९ मध्ये मंजूर झाला होता. तसेच इमारतीच्या प्रत्यक्ष बांधकामास जानेवारी २०२० पासून सुरुवात होणार होती. मात्र यावेळी काही अडचणी आल्याने ठेकेदाराने काम बंद केले. या ठेकेदाराला काळ्या यादीत देखील टाकण्यात आले. मात्र वाजतागायत नवीन इमारतीची अजून एक वीटसुद्धा बसविण्यात आलेली नाही.

स्थानकाच्या बाजूने नाला जातो त्यामुळे स्थानकामध्ये नाल्याचे पाणी साठते. त्यामुळे स्थानकाची इमारत उंच करणे अपेक्षित आहे. जुन्या प्रशासकीय मान्यतेत व टेंडरमध्ये या सर्व गोष्टी नमूद नव्हत्या. त्यामुळे या सर्व गोष्टी नमूद करून कार्यकारी अभियंता राज्य परिवहन महामंडळ मुंबई प्रदेश यांनी सुधारित प्रशासकीय मान्यतेसाठी मध्यवर्ती कार्यालयाकडे प्रस्ताव पाठवला आहे. नूतनिनीकरणास अंदाजे १२ कोटी खर्च अपेक्षित आहे. यामध्ये नवीन सुसज्ज भव्य इमारतीसह विविध सुविधा आदींचा समावेश आहे. प्रशासकीय मान्यता मिळाल्यावर लागलीच टेंडर काढले जाणार होते. मात्र अजूनही टेंडर काढले गेलेले नाही.

मध्यवर्ती कार्यालयाकडे सुधारित प्रशासकीय मान्यतेसाठी नवीन प्रस्ताव पाठवलेला आहे. अजून तेथून मान्यता आलेली नाही. मान्यता मिळाल्यानंतर पुढील प्रक्रिया सुरू होईल. -मीनल मोरे, कार्यकारी अभियंता, राज्य परिवहन महामंडळ मुंबई प्रदेश

स्थानकाचे नूतनीकरण व येथील समस्या मार्गी लावण्यासाठी अनेकदा उपोषण व आंदोलन केले आहे. याबाबत सातत्याने वरिष्ठ स्तरावरून अधिकार्‍यांच्या भेटी घेऊन व निवेदन देऊन पाठपुरावा करत आहे. मात्र अद्यापही कोणतीही उपाययोजना व ठोस कारवाई झाली नाही. त्यामुळे या प्रश्नांवर पुन्हा उपोषणाला बसणार आहे. -रवींद्रनाथ ओव्हाळ, आंदोलनकर्ते, पाली